بلاول بھٹو 3 روزہ دورے پر مظفرآباد پہنچ گئے، پُرتپاک استقبال

پاکستان پیپلز پارٹی کے چیئرمین بلاول بھٹو زرداری تین روزہ اہم تنظیمی دورے پر آزاد کشمیر کے دارالحکومت مظفرآباد پہنچ گئے ہیں، جہاں کوہالہ پل پر قائم مقام صدر آزاد کشمیر و اسپیکر قانون ساز اسمبلی چوہدری لطیف اکبر سمیت پارٹی رہنماؤں اور کارکنوں کی بڑی تعداد نے ان کا پرتپاک استقبال کیا۔ استقبال کے دوران جیالوں نے “جئے بلاول، جئے زرداری” کے فلک شگاف نعرے لگائے، جس کے بعد پی پی پی چیئرمین کو سینکڑوں گاڑیوں کے بڑے قافلے کی شکل میں مظفرآباد لایا گیا۔ سابق وزیرِ اعظم راجہ پرویز اشرف اور صدر پیپلز پارٹی آزاد کشمیر چوہدری محمد یاسین بھی ان کے ہمراہ ہیں۔ اپنے اس دورے کے دوران بلاول بھٹو زرداری پونچھ اور مظفرآباد ڈویژن کے پارٹی امیدواروں اور رہنماؤں سے اہم ملاقاتیں کریں گے، جن میں آزاد کشمیر قانون ساز اسمبلی کے آئندہ انتخابات کے حوالے سے انتخابی حکمتِ عملی پر تفصیلی مشاورت کی جائے گی۔ دورے کے موقع پر سیکیورٹی کے انتہائی سخت انتظامات کیے گئے ہیں، جبکہ صدر پی پی پی آزاد کشمیر چوہدری محمد یاسین کی جانب سے ان کے اعزاز میں ایک خصوصی عشائیہ بھی دیا جا رہا ہے۔