بلاول بھٹو زرداری کا آزاد کشمیر الیکشن کے نتائج تسلیم کرنے سے انکار

پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری نے آزاد کشمیر الیکشن کے نتائج کو ماننے سے صاف انکار کرتے ہوئے چوہدری یاسین کے حلقے کے 30 پولنگ اسٹیشنز پر فوری ری پولنگ کا مطالبہ کر دیا ہے۔ مظفر آباد میں ورکرز کنونشن سے خطاب کرتے ہوئے انہوں نے دعویٰ کیا کہ ان 30 پولنگ اسٹیشنز پر نہ صرف قبضہ کر کے ٹھپے لگانے کے ویڈیو ثبوت موجود ہیں بلکہ وہاں 90 فیصد کا جعلی ٹرن آؤٹ دکھایا گیا ہے۔ بلاول بھٹو نے کہا کہ جمہوریت میں شکست قبول کی جا سکتی ہے لیکن چوری شدہ نتائج کسی صورت تسلیم نہیں کیے جائیں گے، اور اس تمام معاملے کی شفاف تحقیقات کے لیے ‘سچ اور مفاہمت کمیشن’ تشکیل دیا جائے۔ انہوں نے عزم ظاہر کیا کہ پیپلز پارٹی سڑکیں بند کرنے یا بندوق کے بجائے انتخابی اور قانونی راستے سے کشمیری عوام کو ان کے حقوق اور چھینی گئی نشستیں واپس دلائے گی۔