بلاول بھٹو سے پنجاب میں 15 ہزار سے زائد ووٹ حاصل کرنے والے 70 سے زائد پارٹی ٹکٹ ہولڈرز کی ملاقات

لاہور میں پاکستان پیپلزپارٹی کے چیئرمین بلاول بھٹو زرداری سے پنجاب بھر میں 15 ہزار سے زائد ووٹ حاصل کرنے والے 70 سے زائد پارٹی ٹکٹ ہولڈرز نے گورنر ہاؤس میں ملاقات کی۔ ملاقات کے دوران پنجاب میں متوقع بلدیاتی انتخابات سمیت مختلف سیاسی امور اور لائحہ عمل پر مشاورت کی گئی۔
چیئرمین بلاول بھٹو زرداری اور پیپلزپارٹی ٹکٹ ہولڈرز کے درمیان پنجاب کی موجودہ سیاسی صورتِ حال پر بھی تفصیلی گفتگو ہوئی۔ اس موقع پر بلاول بھٹو زرداری کا کہنا تھا کہ اگر نظریاتی سیاسی جماعتیں آگے آئیں تو اس سے ملک اور عوام دونوں کو فائدہ پہنچتا ہے۔
انہوں نے کہا کہ پیپلزپارٹی عوامی طاقت کی بنیاد پر اقتدار میں آنا چاہتی ہے، ہمیں اقتدار حاصل کرنے کا کوئی اور طریقہ قبول نہیں۔ ایک سیاسی جماعت نے قومی اداروں کو نشانہ بنانے کو اپنا معمول بنا لیا ہے، جبکہ ہمارا مطالبہ ہے کہ تمام ادارے اپنے اپنے دائرہ کار میں رہ کر کام کریں۔
بلاول بھٹو زرداری نے کہا کہ سیاسی جماعتوں کو بھی اپنی سیاست سیاسی دائرے تک محدود رکھنی چاہیے، اس طرح انہیں بھی مشکلات کا سامنا نہیں کرنا پڑے گا اور نہ ہی دوسروں کیلئے مسائل پیدا ہوں گے۔
انہوں نے کہا کہ ایسے وقت میں جب افغانستان اور بھارت کی سرحدوں پر خطرات موجود ہیں اور خیبر پختونخوا میں دہشت گردی کے واقعات سامنے آ رہے ہیں، غیر سیاسی انداز میں فوج کو نشانہ بنانے والوں کا مقابلہ کرنا ہوگا