بھکر میں کار کی موٹر سائیکل کو ٹکر، خاتون جاں بحق، 2 بچے زخمی

پنجاب کے شہر بھکر میں تیز رفتاری کے باعث پیش آنے والے ایک افسوسناک ٹریفک حادثے میں کار کی ٹکر سے موٹر سائیکل سوار خاتون جاں بحق اور دو بچے شدید زخمی ہو گئے ہیں۔ عینی شاہدین کے مطابق، یہ حادثہ بھکر کے جھنگ روڈ پر واقع ‘اڈا جہان خان’ کے قریب پیش آیا، جہاں ایک بے قابو تیز رفتار کار نے موٹر سائیکل کو زوردار ٹکر مار دی۔ ٹکر اتنی شدید تھی کہ موٹر سائیکل پر سوار خاتون موقع پر ہی زخموں کی تاب نہ لاتے ہوئے دم توڑ گئیں، جبکہ ان کے ہمراہ موجود دو بچے شدید زخمی ہو گئے۔

ریسکیو ذرائع کا اس حوالے سے کہنا ہے کہ متاثرہ خاندان موٹر سائیکل پر قریبی ہسپتال سے اپنا طبی چیک اپ کروانے کے بعد واپس گھر جا رہا تھا کہ راستے میں اس ناگہانی حادثے کا شکار ہو گیا۔ حادثے کے فوری بعد کار کا ڈرائیور گاڑی سمیت موقع سے فرار ہونے میں کامیاب ہو گیا۔ ریسکیو اہلکاروں نے جائے وقوعہ پر پہنچ کر لاش اور زخمی بچوں کو طبی امداد کے لیے ہسپتال منتقل کیا، جبکہ مقامی پولیس نے واقعے کا مقدمہ درج کر کے مفرور کار ڈرائیور کی گرفتاری کے لیے چھاپے مارنا شروع کر دیے ہیں۔