بیرسٹر گوہر کی محمود اچکزئی سے ملاقات، 27 ستمبر کے لانگ مارچ پر مشاورت

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے قومی اسمبلی میں قائدِ حزبِ اختلاف اور پشتونخوا ملی عوامی پارٹی (پی کے میپ) کے سربراہ محمود خان اچکزئی سے اہم ملاقات کی ہے۔ اس ملاقات کے دوران ملک کی مجموعی سیاسی صورتحال، اپوزیشن تحاد (تحریک تحفظِ آئینِ پاکستان) کی حکمتِ عملی، باہمی تعاون اور آئندہ کے سیاسی و آئینی لائحہ عمل پر تفصیلی مشاورت کی گئی۔

ملاقات کے بعد جاری کردہ اعلامیے کے مطابق، دونوں رہنماؤں نے بانی پی ٹی آئی عمران خان کی بہنوں علیمہ خان، عظمیٰ خان اور نورین نیازی کی گرفتاریوں کی شدید الفاظ میں مذمت کی۔ انہوں نے اپوزیشن کے سیاسی رہنماؤں اور کارکنوں کے خلاف بلاجواز مقدمات، گرفتاریوں اور انہیں ہراساں کیے جانے پر گہری تشویش کا اظہار کیا۔ علاوہ ازیں، ملاقات میں 27 ستمبر کے مجوزہ لانگ مارچ کی تیاریوں کا جائزہ لیا گیا۔ اپوزیشن رہنماؤں کا کہنا تھا کہ یہ مارچ مکمل طور پر پرامن ہوگا اور صرف آئینی و جمہوری حقوق کی بحالی کے لیے کیا جائے گا۔ انہوں نے واضح کیا کہ لانگ مارچ کا حتمی شیڈول اور وقت کا فیصلہ اپوزیشن اتحاد خود طے کرے گا۔