موجودہ ملکی صورتحال میں سب کی نظریں عدالتوں پر ہیں، مذاکرات کا راستہ کھلا رہنا چاہیے: بیرسٹر گوہر

پاکستان تحریکِ انصاف کے چیئرمین بیرسٹر گوہر نے اڈیالہ جیل کے قریب دائگل ناکے پر نیاز اللہ خان نیازی اور راجہ یاسر کے ہمراہ میڈیا سے گفتگو کرتے ہوئے کہا ہے کہ اسلام آباد ہائیکورٹ کی جانب سے بانی پی ٹی آئی سے وکلاء کی ملاقات کا فیصلہ خوش آئند ہے اور عدالتوں کو اپنے احکامات پر عملدرآمد بھی کروانا چاہیے۔ انہوں نے کہا کہ ملک کی موجودہ سیاسی صورتحال پر سب کی نظریں عدلیہ پر لگی ہوئی ہیں۔ سابق آرمی چیف جنرل (ر) باجوہ سے ملاقات سے متعلق سوال پر انہوں نے وضاحت کی کہ یہ صرف ایک غیر رسمی ‘ہیلو ہائی’ تھی کیونکہ ان کا بنیادی مقصد بانی پی ٹی آئی کی رہائی کے لیے ہر ممکن کوشش کرنا ہے اور بات چیت کے راستے کھلے رہنے چاہئیں۔ مولانا فضل الرحمن سے متعلق بات کرتے ہوئے انہوں نے واضح کیا کہ جے یو آئی کے ساتھ باقاعدہ اتحاد نہیں بلکہ آل پارٹیز کانفرنس (APC) کے لیے رابطے جاری ہیں۔ خیبر پختونخوا میں تجاوزات کے خلاف آپریشن پر انہوں نے کہا کہ غیر قانونی تعمیرات کے خلاف اقدام درست ہے لیکن اسے سیاسی انتقام کا ذریعہ نہیں بننا چاہیے۔