شہداء کی قربانیوں کا نعم البدل دنیا کے خزانے بھی نہیں: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر خان نے واضح کیا ہے کہ شہدائے وطن پوری قوم کے اصل ہیرو ہیں جن کی بے مثال قربانیوں کا نعم البدل دنیا کے تمام خزانے بھی نہیں ہو سکتے۔ راولپنڈی میں اڈیالہ روڈ پر داہگل ناکے کے مقام پر میڈیا سے گفتگو کرتے ہوئے بیرسٹر گوہر خان نے دہشت گردی کو ایک ناسور قرار دیا اور کہا کہ ملکی بقا اور سیکیورٹی کی خاطر افواجِ پاکستان کے جوان روزانہ اپنی جانوں کے نذرانے پیش کر رہے ہیں، جن کی قربانیوں کے پوری قوم دل سے معترف ہے اور انہیں سلام پیش کرتی ہے۔ انہوں نے سیاسی رہنماؤں پر زور دیا کہ جوشِ خطابت میں قومی اداروں اور شہدا کے حوالے سے الفاظ کے انتخاب میں انتہائی احتیاط برتی جائے کیونکہ ملکی سلامتی پر کوئی سمجھوتہ نہیں کیا جا سکتا۔ ایک سوال کے جواب میں چیئرمین پی ٹی آئی نے آزاد جموں و کشمیر کے انتخابات کے حوالے سے گفتگو کرتے ہوئے بتایا کہ پارٹی کا الیکشن بائیکاٹ کا فیصلہ تاحال برقرار ہے، تاہم اگر وہاں کی سیکیورٹی یا سیاسی صورتحال بہتر ہوئی تو اس فیصلے پر نظرثانی کی جا سکتی ہے۔