بنوں:آرمی انجینئرنگ کی گاڑی دریائے میں گرنے سے 4 اہلکار جاں بحق، 2 لاپتہ

بنوں: بنوں کے علاقے میں فوجی انجینئرنگ کی گاڑی حادثے کا شکار ہو کر دریائے ٹوچی میں جا گری، جس کے نتیجے میں 4 اہلکار شہید جبکہ 2 لاپتہ ہو گئے۔

ذرائع کے مطابق ہفتہ کے روز 18 اہلکاروں کو لے جانے والی گاڑی سب ڈویژن وزیر بنوں کے علاقے گربز، تھانہ اتمانزئی کی حدود میں ڈرائیور سے بے قابو ہو کر دریا میں جا گری۔

حادثے کے فوراً بعد مقامی افراد نے امدادی سرگرمیوں کا آغاز کیا جبکہ زخمی اہلکاروں کو فوری طور پر کمبائنڈ ملٹری ہسپتال منتقل کر دیا گیا۔

ریسکیو حکام کے مطابق اب تک 12 اہلکاروں کو بحفاظت نکال لیا گیا ہے جبکہ 4 اہلکاروں کی لاشیں بھی برآمد کر لی گئی ہیں۔ لاپتہ 2 اہلکاروں کی تلاش کے لیے سرچ آپریشن تیزی سے جاری ہے۔

حکام کا کہنا ہے کہ جائے حادثہ پر امدادی کارروائیاں جاری ہیں اور دریا میں تلاش کا عمل مکمل ہونے تک جاری رکھا جائے گا۔