بنگلہ دیش ڈٹ گیا، ٹی ٹوئنٹی ورلڈکپ کےلیے بھارت نہ جانےکا فیصلہ برقرار

بنگلادیش ٹی ٹوئنٹی ورلڈکپ کےلیے بھارت نہ جانےکے فیصلے پر ڈٹ گیا۔بنگلادیش کرکٹ بورڈ  نے ٹی ٹوئنٹی ورلڈکپ کھیلنے کیلئے اپنی ٹیم بھارت نہ بھیجنے کے فیصلے کو تبدیل نہ کرنے کا اعلان کیا ہے۔

بنگلہ دیشی دارالحکومت ڈھاکا میں مشیر کھیل بنگلادیش ڈاکٹر آصف نذرل اور بنگلا دیش کے کھلاڑیوں کے درمیان اجلاس ختم  ہوگیا۔مشیر کھیل نے اجلاس کے بعد اعلان کیا ہے کہ بنگلا دیش ٹیم ورلڈکپ کے لیے بھارت نہیں جائے گی۔ ہم کھیلنا چاہتے ہیں ہمیں اب بھی امید ہے کہ آئی سی سی ہماری بات تسلیم کرے گا۔

آصف نذرل کاکہناتھاکہ بھارت میں ہمیں سکیورٹی خطرات کا سامنا ہے، آئی سی سی نے ہمارے تحفظات کو تسلیم نہیں کیا، بھارتی حکومت نے ہمیں قائل کرنے کی کوئی سنجیدہ کوشش تک نہیں کی۔ان کا کہنا تھا کہ ورلڈ کپ کے بائیکاٹ کا فیصلہ ہماری حکومت کا ہے، ہم نے ہائبرڈ ماڈل کے تحت میچز کروانے کی درخواست کی۔ ہم ورلڈکپ کھیلنا چاہتے ہیں اور ورلڈکپ کے لیے وینیو سری لنکا ہونا چاہیے، کرکٹرز کو اعتماد میں لیا گیا ہے وہ ہمارے مؤقف سے اتفاق کرتے ہیں ۔

دوسری جانب بنگلادیش کرکٹ بورڈ کے صدر امین الاسلام کا کہنا ہے کہ ہم اس معاملے کو آخر تک نہیں چھوڑیں گے، یہ ہمارا حق ہے ہم آئی سی سی سے دوبارہ رابطہ کریں گے۔ ہم سری لنکا میں کھیلنا چاہتے ہیں۔