بنگلہ دیش میں عام انتخابات 12 فروری کو ہوں گے، تاریخ کا باضابطہ اعلان

ڈھاکا: بنگلہ دیشی الیکشن کمیشن نے ملک میں عام انتخابات کی تاریخ کا اعلان کرتے ہوئے بتایا ہے کہ آئندہ انتخابات 12 فروری 2026 کو منعقد ہوں گے۔ یہ انتخابات شیخ حسینہ حکومت کے خاتمے کے بعد ہونے والا پہلا بڑا جمہوری عمل ہوں گے، جس روز جمہوری اصلاحات کے چارٹر پر ریفرنڈم بھی کرایا جائے گا۔

قومی نشریاتی خطاب میں چیف الیکشن کمشنر نے کہا کہ اس مرتبہ اوورسیز بنگلہ دیشی شہری پہلی بار پوسٹل بیلٹ کے ذریعے اپنا ووٹ کاسٹ کر سکیں گے۔ الیکشن کمیشن کے مطابق ملک بھر میں تقریباً 12 کروڑ 76 لاکھ رجسٹرڈ ووٹرز اپنے نمائندے منتخب کریں گے، جبکہ ووٹنگ کا وقت ایک گھنٹہ بڑھا کر مجموعی طور پر نو گھنٹے کر دیا گیا ہے۔

عبوری حکومت کے سربراہ ڈاکٹر محمد یونس نے انتخابات کی تاریخ کے اعلان کو ملک کی جمہوری تاریخ کا اہم سنگِ میل قرار دیا۔ انہوں نے کہا کہ 2024 کی تاریخی بغاوت کے بعد یہ انتخاب بنگلہ دیش کے نئے سیاسی سفر کی بنیاد ثابت ہوگا۔ ان کا کہنا تھا کہ حکومت الیکشن کمیشن کو شفاف، پُرامن اور مکمل طور پر غیر جانبدارانہ انتخابات کے لیے تمام ضروری وسائل فراہم کرے گی۔