صدر بی سی بی نے حکومت سے بات کرنے کیلئے آئی سی سی سے وقت مانگ لیا

بنگلا دیش کرکٹ بورڈ کے صدر امین الاسلام کا کہنا ہے کہ حکومت سے مشاورت کے لیے انٹرنیشنل کرکٹ کونسل (آئی سی سی) سے وقت مانگا گیا ہے۔ انہوں نے کہا کہ کھلاڑی اور حکومت دونوں ورلڈ کپ میں شرکت کے خواہاں ہیں، تاہم بھارت ہمارے لیے محفوظ نہیں۔

امین الاسلام کے مطابق بنگلا دیش کی خواہش ہے کہ ورلڈ کپ کے میچز سری لنکا میں کھیلنے کی اجازت دی جائے۔ ان کا کہنا تھا کہ کھلاڑیوں کی سلامتی اولین ترجیح ہے اور اس معاملے پر کسی قسم کا سمجھوتہ نہیں کیا جا سکتا۔

بی سی بی کے صدر اور ڈائریکٹر کی حکومت کی جانب سے مقرر کردہ سپورٹس ایڈوائزر سے ملاقات متوقع ہے، جس میں بھارت میں کھیلنے یا نہ کھیلنے سے متعلق حتمی سفارشات تیار کی جائیں گی۔
ذرائع کے مطابق بنگلا دیش کی عبوری حکومت آج کابینہ اجلاس میں اس معاملے پر حتمی فیصلہ کر سکتی ہے۔