سابق ایم پی اے عبدالمجید اچکزئی کو 10 سال قید بامشقت کا حکم

بلوچستان ہائیکورٹ نے ٹریفک سب انسپکٹر عطاء اللہ کی گاڑی سے کچل کر ہلاکت کے کیس میں سابق رکنِ صوبائی اسمبلی (ایم پی اے) عبدالمجید اچکزئی کو 10 سال قیدِ بامشقت کی سزا سنا دی ہے۔ جسٹس محمد عامر نواز رانا اور جسٹس عبدالقیوم لہڑی پر مشتمل دو رکنی بینچ نے بریت کے خلاف دائر اپیل پر فیصلہ سناتے ہوئے ایڈیشنل سیشن جج کا 4 ستمبر 2020 کا بریت کا فیصلہ کالعدم قرار دے دیا۔ عدالت عالیہ نے سابق ایم پی اے کو تعزیراتِ پاکستان کی دفعہ 320 کے تحت مجرم قرار دیتے ہوئے مقتول کے قانونی ورثاء کو دیت کی رقم ادا کرنے اور ملزم کے فوری ناقابلِ ضمانت وارنٹِ گرفتاری جاری کر کے جیل منتقل کرنے کا حکم دیا ہے۔ واضح رہے کہ جون 2017 میں کوئٹہ کے جی پی او چوک پر عبدالمجید اچکزئی کی تیز رفتار گاڑی کی ٹکر سے ٹریفک سب انسپکٹر جاں بحق ہو گئے تھے۔