مستونگ کی سب تحصیل کھڈکوچہ میں غیر معینہ مدت کے لیے کرفیو نافذ

بلوچستان حکومت نے ضلع مستونگ کی سب تحصیل کھڈکوچہ میں امن و امان کی صورتحال کے پیشِ نظر آج رات 9 بجے سے تاحکمِ ثانی مکمل کرفیو نافذ کرنے کا باضابطہ اعلان کر دیا ہے۔ یہ فیصلہ علاقے میں سیکیورٹی صورتحال اور امن و امان کو برقرار رکھنے کی حکمتِ عملی کے تحت کیا گیا ہے۔

معاون محکمہ داخلہ بلوچستان بابر یوسفزئی کے مطابق کرفیو کے دوران تمام شہریوں کی غیر ضروری نقل و حرکت پر مکمل پابندی رہے گی اور کسی بھی شخص کو گھروں سے باہر نکلنے کی اجازت نہیں ہوگی۔ انہوں نے عوامی تحفظ کو یقینی بنانے کے لیے شہریوں سے اپیل کی کہ وہ ضلعی انتظامیہ کی جاری کردہ ہدایات پر سختی سے عمل کریں اور علاقے میں امن قائم رکھنے کے لیے قانون نافذ کرنے والے اداروں کے ساتھ مکمل تعاون کریں۔

بابر یوسفزئی نے خبردار کیا ہے کہ کرفیو اور انتظامی احکامات کی خلاف ورزی کرنے والے افراد کے خلاف قانون کے مطابق بلاامتیاز سخت ترین قانونی کارروائی کی جائے گی۔ ان کا مزید کہنا تھا کہ محکمہ داخلہ بلوچستان صورتحال پر مسلسل نظر رکھے ہوئے ہے اور عوام کے جانی و مالی تحفظ اور امن کی بحالی کے لیے تمام تر ضروری اور اضطراری اقدامات کیے جا رہے ہیں۔