پاکستان اور سعودیہ کا خواتین کے حقوق، خاندانی نظام اور مشترکہ تعاون کے فروغ کا اعادہ

وفاقی وزیر برائے انسانی حقوق اعظم نذیر تارڑ نے مملکت سعودی عرب کی فیملی افیئرز کونسل کی سیکرٹری جنرل ڈاکٹر میمونہ الخلیل سے ایک اہم ملاقات کی ہے۔ اس ملاقات کے دوران خواتین کے حقوق، مسلم معاشروں میں خاندانی نظام کے تحفظ اور اسلامی تعاون تنظیم (او آئی سی) کے تحت باہمی تعاون کو مزید وسعت دینے پر تفصیلی تبادلہ خیال کیا گیا۔ دونوں رہنماؤں نے سعودی عرب کی حالیہ سماجی و اقتصادی اصلاحات، وہاں مختلف شعبوں میں خواتین کی بڑھتی ہوئی شمولیت کو سراہا اور دونوں ممالک کے درمیان باہمی تجربات کے تبادلے پر اتفاق کیا۔

ملاقات کے دوران گفتگو کرتے ہوئے وفاقی وزیر اعظم نذیر تارڑ نے کہا کہ دینِ اسلام نے خواتین کو تعلیم، وراثت، کاروبار اور معاشرتی زندگی میں بھرپور حقوق عطا کیے ہیں، اور امہات المومنین حضرت خدیجہؓ، حضرت عائشہؓ اور خاتونِ جنت حضرت فاطمہؓ کی مبارک زندگیاں دنیا بھر کی خواتین کے لیے بہترین عملی نمونہ ہیں۔

انہوں نے پاکستان میں خواتین کی ترقی کا ذکر کرتے ہوئے فخر سے بتایا کہ پاکستان مسلم دنیا کا وہ پہلا ملک ہے جس نے ایک خاتون وزیراعظم کو منتخب کیا، جبکہ آج بھی پاکستانی خواتین ملکی ترقی، سیاست، معیشت اور دیگر قومی شعبوں میں انتہائی نمایاں اور کلیدی کردار ادا کر رہی ہیں۔ ملاقات کے اختتام پر پاکستان اور مملکت سعودی عرب نے او آئی سی کے پلیٹ فارم کا استعمال کرتے ہوئے مسلم امہ میں خواتین کو بااختیار بنانے، خاندانی نظام کے استحکام اور مشترکہ سماجی مفادات کے لیے تعاون کو مزید فروغ دینے کے پختہ عزم کا اعادہ کیا۔