آزاد کشمیر انتخابات کا پہلا مرحلہ، پولنگ کا وقت ختم، ووٹوں کی گنتی جاری

آزاد جموں و کشمیر قانون ساز اسمبلی انتخابات کے پہلے مرحلے میں پولنگ کا وقت ختم ہونے کے بعد ووٹوں کی گنتی کا عمل شروع ہو گیا ہے۔ سیاسی جماعتوں کی درخواست پر پولنگ کا وقت 1 گھنٹہ بڑھا کر شام 6 بجے تک کیا گیا تھا۔ میرپور، بھمبر اور کوٹلی کے 13 حلقوں کی نشستوں کے لیے 288 امیدواروں کے درمیان کانٹے کا مقابلہ ہے، جہاں 14 لاکھ 437 سے زائد رجسٹرڈ ووٹرز کے لیے 2,316 پولنگ اسٹیشنز قائم کیے گئے تھے۔ سیکیورٹی کے لیے 18,560 اہلکار اور پاک فوج کے 2,100 جوان مامور رہے۔ انتخابی عمل کے دوران بھمبر کے علاقے بابا شادی شہید میں شرپسندوں نے 232 ووٹوں پر مشتمل بیلٹ باکس چھین کر آگ لگا دی، جبکہ الیکشن کمیشن نے مبینہ بے ضابطگی پر 2 پریزائیڈنگ افسران کو معطل کر کے ان کے خلاف قانونی کارروائی شروع کر دی ہے۔