بابری مسجد کی جگہ بنائے گئے مندر سے 20 کروڑ روپے سے زائد عطیات چوری؛ 8 افراد گرفتار

بھارتی شہر ایودھیا میں حال ہی میں تعمیر کیے گئے رام مندر میں جمع ہونے والے عطیات کی گنتی کے نظام میں کروڑوں روپے کی ہوشربا کرپشن اور خرد برد کا انکشاف ہوا ہے۔ بھارتی میڈیا کے مطابق اس بڑے اسکینڈل کے سامنے آنے کے بعد تحقیقات کا دائرہ وسیع کر دیا گیا ہے اور پولیس نے اب تک 8 افراد کو گرفتار کر لیا ہے، جبکہ بینک اہلکار اور مندر ٹرسٹ کے بعض سابق عہدیدار بھی تفتیش کی زد میں آ گئے ہیں۔

بھارتی پولیس کا کہنا ہے کہ ابتدائی شواہد کے مطابق عطیات کی گنتی پر مامور عملے نے تقریباً 7 سے ساڑھے 7 کروڑ بھارتی روپے (جو 20 کروڑ سے زائد پاکستانی روپے بنتے ہیں) خرد برد کیے۔ پولیس نے ملزمان کے قبضے سے 70 سے 80 لاکھ روپے نقد برآمد کرنے کا دعویٰ کیا ہے، جبکہ بقیہ رقم اور اثاثوں کا سراغ لگایا جا رہا ہے۔ تفتیش کے مطابق ملزمان نے اس رقم سے قیمتی جائیدادیں خریدیں، جن میں 65 لاکھ روپے کا مکان، فارم ہاؤس، اسپورٹس یوٹیلٹی گاڑی (SUV)، مہنگی موٹر سائیکل اور دیگر قیمتی سامان شامل ہیں۔

رپورٹس کے مطابق اسٹیٹ بینک آف انڈیا (SBI) نے تقریباً تین ماہ قبل ہی عطیات گننے والے عملے پر شبہ ظاہر کرتے ہوئے انہیں تبدیل کرنے کی سفارش کی تھی، تاہم اس پر عمل نہیں کیا گیا۔ اب تک بینک کے 2 ملازمین کے کرپشن میں ملوث ہونے کے ٹھوس شواہد ملے ہیں۔ پولیس نے کارروائی آگے بڑھاتے ہوئے مندر ٹرسٹ کے سابق جنرل سیکریٹری چمپت رائے کا بیان ریکارڈ کر لیا ہے، جبکہ سابق ٹرسٹی انیل مشرا اور گوپال راؤ کو بھی شاملِ تفتیش کرنے کے لیے نوٹس جاری کیے جانے کا امکان ہے۔انکشاف ہوا ہے کہ گرفتار کیے گئے کئی ملزمان کو سفارش پر نوکری دی گئی تھی اور تعيناتى سے قبل ان کی پولیس ویریفکیشن (تصدیق) بھی نہیں کرائی گئی تھی۔ اس بڑے اسکینڈل کے بعد رام مندر ٹرسٹ نئی بھرتیوں کے لیے سخت قواعد متعارف کرانے پر غور کر رہا ہے، جس کا حتمی فیصلہ 11 جولائی کو ہونے والے اجلاس میں کیا جائے گا۔