شہید علی خامنہ ای کو خراج تحسین پیش کرنے طالبان وفد اور احمد مسعود بھی پہنچ گئے

ایران کے سپریم لیڈر آیت اللہ علی خامنہ ای کی تجہیز و تکفین کی تقریبات کا باقاعدہ آغاز ہو گیا ہے، جس میں عالمی رہنماؤں اور غیر ملکی وفود کے ساتھ ساتھ افغان طالبان کا اعلیٰ سطحی وفد بھی شریک ہے۔

عالمی خبر رساں ادارے کے مطابق، شہید سپریم لیڈر کا جسدِ خاکی تہران کے ‘امام خمینی جامع مصلیٰ’ لایا گیا ہے، جہاں بیرونِ ملک سے آنے والے سفارتی وفود اور معززین فاتحہ خوانی اور ایرانی حکام سے تعزیت کر رہے ہیں۔ تقریب میں افغانستان کی طالبان حکومت کے ایک اعلیٰ وفد نے شرکت کی، جس کی قیادت نائب وزیرِ اعظم ملا عبدالغنی برادر اخوند اور وزیرِ خارجہ امیر خان متقی کر رہے ہیں۔ طالبان وفد نے ایرانی حکام اور مرحوم رہنما کے لواحقین سے ملاقات کر کے گہرے دکھ کا اظہار کیا۔

دلچسپ اور حیران کن طور پر، طالبان وفد کی آمد کے ساتھ ہی افغانستان میں طالبان حکومت کے کٹر مخالف اور نیشنل ریزسٹنس فرنٹ (NRF) کے سربراہ احمد مسعود بھی تعزیت کے لیے تہران پہنچ گئے ہیں۔ ان کے علاوہ افغانستان کے معروف شیعہ رہنما اور حزبِ وحدتِ اسلامی کے سربراہ محمد محقق نے بھی تقریب میں شرکت کی اور اہل خانہ سے دعائے مغفرت کی۔

ایرانی میڈیا کے مطابق، دنیا کے 100 سے زائد ممالک کے سربراہان، وزرائے اعظم اور اعلیٰ حکام نے آیت اللہ علی خامنہ ای کی نمازِ جنازہ میں شرکت کی تصدیق کی ہے، جبکہ صرف تہران میں ایک کروڑ سے زائد سوگواروں کا مجمع اکٹھا ہونے کا امکان ظاہر کیا جا رہا ہے۔ تعزیتی تقریبات کا یہ سلسلہ مختلف شہروں سے ہوتا ہوا 9 جولائی کو مشہد مقدس میں اختتام پذیر ہوگا، جہاں انہیں حضرت امام علی رضا علیہ السلام کے روضہ مبارک کے احاطے میں سپردِ خاک کیا جائے گا۔