آیت اللہ علی خامنہ ای کا جسد خاکی نجف منتقل، صدر پزشکیان بھی پہنچ گئے

ایرانی میڈیا کے مطابق ایران کے سپریم لیڈر آیت اللہ علی خامنہ ای کا جسدِ خاکی تہران اور قم میں نمازِ جنازہ کی ادائیگی کے بعد خصوصی طیارے کے ذریعے عراق کے مقدس شہر نجف منتقل کر دیا گیا ہے، جہاں ان کے آخری دیدار اور خراجِ عقیدت کے لیے عراقی شہریوں کی ایک بہت بڑی تعداد جمع ہے۔

ایرانی صدر مسعود پزشکیان شہید رہبر کی نمازِ جنازہ اور آخری رسومات میں شرکت کے لیے خود نجف پہنچ گئے ہیں، جہاں عراقی وزیراعظم علی الزیدی نے ان کا شاندار استقبال کیا۔ اس کے علاوہ پاسدارانِ انقلاب کی قدس فورس کے سربراہ جنرل اسماعیل قانی بھی نجف میں موجود ہیں۔ شہر میں مختلف مقامات پر عوام کی جانب سے ایرانی رہنما کو الوداعی خراجِ عقیدت پیش کیا جا رہا ہے اور سیکیورٹی کے انتہائی سخت انتظامات کیے گئے ہیں۔ اس سے قبل جسدِ خاکی کو ہیلی کاپٹر کے ذریعے قم لے جایا گیا تھا جہاں ان کا جنازہ ادا کیا گیا۔

اس سے قبل دارالحکومت تہران میں ہونے والے جلوسِ جنازہ میں عالمی میڈیا اور سیٹلائٹ تصاویر کے مطابق ایک کروڑ 20 لاکھ سے ڈیڑھ کروڑ افراد نے شرکت کی۔ ہجوم اس قدر کثیر تھا کہ اسے خلا (اسپیس) سے بھی واضح طور پر دیکھا جا سکتا تھا۔عالمی خبر رساں ادارے رائٹرز نے سیٹلائٹ تصاویر جاری کرتے ہوئے کہا کہ یہ جلوسِ جنازہ محض ایک روایتی الوداع نہیں بلکہ جنگ کے بعد ایرانی مزاحمت کی ایک طاقتور علامت بن کر سامنے آیا ہے۔

بین الاقوامی ماہرین کے مطابق تہران کے اس تاریخی جنازے نے دنیا خصوصاً امریکا اور اسرائیل کو ایک واضح پیغام دیا ہے کہ ایران کو اندرونی طور پر تقسیم کرنے اور اس کے حصے بخرے کرنے کی بیرونی کوششیں مکمل ناکام ہو گئی ہیں۔ ایران اس مشکل ترین جنگی صورتحال میں بھی محفوظ رہا ہے اور یہی بقا اب اس کی مستقبل کی مذاکراتی حکمتِ عملی کی بنیاد بنے گی۔ اس عوامی سمندر نے ثابت کیا ہے کہ آبنائے ہرمز (Strait of Hormuz) پر ایران کا اثر و رسوخ مزید مضبوط ہوا ہے، اور اب نیوکلیئر پروگرام پر کوئی بھی ممکنہ ڈیل اس حقیقت کو تسلیم کرنے سے ہی جڑی ہوگی کہ اس اہم بحری گزرگاہ کا کنٹرول ایران کے پاس ہے۔