پاکستانیوں کے لیے آسٹریلیا کا ویزا حاصل کرنا مزید آسان، نئی ایپ متعارف

آسٹریلین ہائی کمیشن پاکستان نے اعلان کیا ہے کہ اب پاکستانی شہریوں کے لیے آسٹریلیا کا ویزا اپلائی کرنا پہلے کے مقابلے میں کہیں زیادہ آسان ہو گیا ہے، کیونکہ آسٹریلین بائیومیٹرک ایپ پاکستان میں متعارف کر دی گئی ہے۔

ہائی کمیشن کے مطابق نئی ایپ کے بعد ایسے درخواست دہندگان کو بائیومیٹرک سینٹر جانے کی ضرورت نہیں، جنہوں نے ماضی میں اپنی بائیومیٹرکس آسٹریلین حکام کو فراہم کر رکھی ہو اور ان کا پاسپورٹ بھی سسٹم میں موجود ریکارڈ سے مطابقت رکھتا ہو۔ اس سہولت سے پاکستانیوں کا وقت اور اخراجات دونوں میں نمایاں کمی آئے گی۔

آسٹریلیا کے ہائی کمشنر ٹموتھی کین نے بتایا کہ پاکستانی طلبہ، سیاح اور ورک ویزا کے امیدوار اب زیادہ سہولت کے ساتھ درخواست جمع کرا سکیں گے۔ یہ ایپ اس وقت دنیا کے 34 ممالک میں فعال ہے۔

ہائی کمشنر کے مطابق 2026 کے اوائل تک ایپ کو مکمل طور پر عالمی سطح پر چلانے کا منصوبہ بھی مکمل کر لیا جائے گا۔