تحریک انصاف کی ہسٹری جلاؤ گھیراؤ اور لاشیں گرانا ہے: عطا تارڑ

وفاقی وزیرِ اطلاعات و نشریات عطا تارڑ نے کہا ہے کہ پاکستان تحریک انصاف (PTI) کی سیاسی تاریخ ہمیشہ سے جلاؤ گھیراؤ، بدامنی اور لاشوں کی سیاست کے گرد گھومتی رہی ہے۔ نجی نیوز چینل کے پروگرام میں گفتگو کرتے ہوئے انہوں نے واضح کیا کہ اسلام آباد اور وہاں کے شہریوں کی حفاظت کرنا حکومت کی آئینی ذمہ داری ہے اور شہر میں امن و امان کی صورتِ حال خراب کرنے کی کسی کو اجازت نہیں دی جائے گی۔ انہوں نے کہا کہ وزیراعظم شہباز شریف نے متعدد بار پی ٹی آئی کو مذاکرات کی پیشکش کی ہے، لیکن حکومت قانون کی بالادستی پر کوئی سمجھوتہ نہیں کرے گی۔

عطا تارڑ نے تحریک انصاف پر شدید تنقید کرتے ہوئے الزام عائد کیا کہ پارٹی پولیس فورس کو سیاسی بنانے اور اپنے مقاصد کے لیے استعمال کرنے کی خواہش مند ہے، جسے ہرگز پورا نہیں ہونے دیا جائے گا۔ بانی پی ٹی آئی کے مقدمات پر بات کرتے ہوئے انہوں نے کہا کہ پی ٹی آئی نے نالائق وکلا مقرر کر کے اپنے مقدمات خود خراب کیے۔ وفاقی وزیر نے الزام عائد کیا کہ تحریک انصاف کالعدم تحریک طالبان پاکستان (TTP) کی ‘بی ٹیم’ کے طور پر کام کر رہی ہے۔ وزیراعلیٰ خیبر پختونخوا کی گرفتاری کے امکان سے متعلق سوال پر ان کا کہنا تھا کہ عام طور پر وزرائے اعلیٰ گرفتار نہیں ہوتے اور فی الحال ایسا کوئی امکان نظر نہیں آتا، تاہم کسی کو بھی قانون ہاتھ میں لینے کی اجازت نہیں ہوگی۔