جوائنٹ ایکشن کمیٹی کے تانے بانے بھارت سے ملتے ہیں، ثبوت سامنے آ گئے:عطا تارڑ

وفاقی وزیر اطلاعات و نشریات عطا اللہ تارڑ نے انکشاف کیا ہے کہ بھارتی خفیہ ایجنسی ‘را’ سے منسلک پاکستان مخالف سوشل میڈیا پروپیگنڈا نیٹ ورک بے نقاب کر دیا گیا ہے، جبکہ کالعدم جوائنٹ ایکشن کمیٹی کے بھارت سے براہِ راست روابط کے بھی ثبوت سامنے آئے ہیں۔

ایک ویڈیو بیان میں عطا اللہ تارڑ نے بتایا کہ سکیورٹی فورسز نے ڈیجیٹل مارکیٹنگ کی آڑ میں پروپیگنڈا مہم چلانے والے ایک شخص کو گرفتار کیا ہے جسے بھارت سے مواد فراہم کیا جا رہا تھا۔ اس مواد کا بنیادی مقصد کالعدم ایکشن کمیٹی کے بیانیے کو فروغ دینا، عوام کو ریاستی اداروں کے خلاف اکسانا اور ملک میں بداعتمادی پیدا کرنا تھا۔ انہوں نے واضح کیا کہ کالعدم کمیٹی سے وابستہ شرپسندوں کو اس طرزِ عمل کا قوم کو جواب دینا ہوگا۔

وفاقی وزیر کا مزید کہنا تھا کہ اگر مذکورہ کمیٹی کے رہنما کشمیر سے مخلص ہیں تو انہیں اسلحے اور ڈنڈوں کی سیاست چھوڑ کر جمہوری عمل کے ذریعے انتخابات کا حصہ بننا چاہیے۔ انہوں نے بتایا کہ قانون نافذ کرنے والے ادارے مختلف پہلوؤں سے تحقیقات کر رہے ہیں اور تمام حقائق سامنے آنے کے بعد ذمہ دار عناصر کے خلاف سخت قانونی کارروائی کی جائے گی۔