معروف سینئر اداکار عاصم بخاری 76 برس کی عمر میں انتقال کرگئے

لاہور: پاکستان فلم اور ڈراما انڈسٹری کے سینئر اداکار عاصم بخاری 76 برس کی عمر میں انتقال کرگئے۔

خاندانی ذرائع کے مطابق عاصم بخاری گزشتہ رات قومہ کی حالت میں چلے گئے تھے۔ وہ کافی عرصے سے گردوں اور دل کے امراض میں مبتلا تھے اور گزشتہ پندرہ روز سے اسپتال میں زیر علاج تھے۔

مرحوم نے اپنے فنی سفر کے دوران ٹی وی ڈراموں، اسٹیج ڈراموں اور فلموں میں نمایاں کردار ادا کیے اور اپنی اداکاری کے ذریعے ناظرین کے دلوں میں جگہ بنائی۔

شوبز حلقوں میں عاصم بخاری کو ایک تجربہ کار اداکار کے ساتھ ساتھ ایکٹنگ کے استاد کے طور پر بھی پہچانا جاتا تھا۔

ادھر مرحوم کے صاحبزادے اجلال بخاری لندن کے ایک اسپتال میں پتے میں پتھری کے باعث زیر علاج ہیں۔