ایشین گیمز ہاکی: پاکستان نے عمان کو شکست دیکر سیمی فائنل کیلئے کوالیفائی کر لیا

ایشین گیمز 2026ء کے ہاکی مقابلے میں قومی ٹیم نے شاندار کارکردگی کا مظاہرہ کرتے ہوئے عمان کی ہاکی ٹیم کو 2 کے مقابلے میں 7 گول سے شکست دے دی ہے اور اس شاندار فتح کے ساتھ ہی سیمی فائنل کے لیے کوالیفائی کر لیا ہے۔

میچ کے پہلے ہاف میں پاکستان کو 1-2 کی معمولی برتری حاصل تھی، تاہم دوسرے ہاف میں قومی کھلاڑیوں نے جارحانہ کھیل پیش کرتے ہوئے عمان کے خلاف گولز کی برسات کر دی۔ پاکستان کی فتح میں رانا وحید نے شاندار کھیل کا مظاہرہ کرتے ہوئے ہیٹ ٹرک اسکور کی، جبکہ سفیان خان نے 2، غضنفر علی اور محمد عماد نے ایک ایک گول کر کے ٹیم کی کامیابی میں اہم کردار ادا کیا۔

اس کامیابی کے بعد پاکستان نے پول ’بی‘ میں مجموعی طور پر 12 پوائنٹس کے ساتھ دوسری پوزیشن حاصل کی ہے، جبکہ ملائیشیا کی ٹیم 15 پوائنٹس کے ساتھ پول میں ٹاپ پوزیشن پر رہی۔ مجموعی طور پر پاکستان نے پول مرحلے کے 5 میچز کھیلے جن میں سے 4 میں شاندار فتح حاصل کی، اور ایونٹ کے دوران پاکستان کو صرف ملائیشیا کے خلاف شکست کا سامنا کرنا پڑا تھا۔

گروپ میچز کے دوران پاکستان کی مجموعی کارکردگی متاثر کن رہی، جہاں قومی ٹیم نے 5 میچز میں حریف ٹیموں کے خلاف 28 گول کیے جبکہ پاکستان کے خلاف مجموعی طور پر 8 گول ہوئے۔