بھارتی لیجنڈری گلوکارہ آشا بھوسلے انتقال کر گئیں، موسیقی کا سنہری باب بند

بھارتی موسیقی کی لیجنڈری گلوکارہ آشا بھوسلے 92 برس کی عمر میں انتقال کر گئیں، جس کے ساتھ ہی موسیقی کی دنیا کا ایک سنہری باب اختتام کو پہنچ گیا۔

خاندانی ذرائع کے مطابق ان کی آخری رسومات کل شام کو ادا کی جائیں گی۔ ان کے بیٹے آنند بھوسلے نے بھی ان کے انتقال کی تصدیق کی ہے۔

بھارتی میڈیا رپورٹس کے مطابق آشا بھوسلے کو سینے کے انفیکشن کے باعث اسپتال میں داخل کیا گیا تھا، جہاں ان کی حالت بگڑنے کے بعد متعدد اعضا نے کام کرنا چھوڑ دیا، جو ان کے انتقال کا سبب بنا۔

ان کی پوتی زنائی بھوسلے نے سوشل میڈیا پر ان کی علالت سے متعلق آگاہ کیا تھا اور بتایا تھا کہ انہیں شدید تھکن اور سینے کے انفیکشن کے باعث اسپتال منتقل کیا گیا ہے۔

آشا بھوسلے نے اپنے طویل کیریئر کے دوران فلمی گانوں، غزلوں، قوالی اور کلاسیکی موسیقی سمیت 20 سے زائد زبانوں میں ہزاروں گیت گائے اور ایک منفرد مقام حاصل کیا۔

انہوں نے اپنے فنی سفر کا آغاز 1943ء میں محض 10 سال کی عمر میں کیا تھا جبکہ انہیں کلاسیکی موسیقی کی تربیت ان کے والد دینا ناتھ منگیشکر نے دی۔

2011ء میں انہیں دنیا میں سب سے زیادہ گانے ریکارڈ کرنے والی گلوکارہ قرار دیا گیا، جبکہ انہیں دادا صاحب پھالکے ایوارڈ اور پدم وبھوشن سمیت کئی بڑے اعزازات سے بھی نوازا گیا۔