ہمیں نہ چھیڑا جائے، مزید جنگ برداشت نہیں کریں گے: اسد قیصر

پاکستان تحریک انصاف کے رہنما اور سابق اسپیکر قومی اسمبلی اسد قیصر نے کہا ہے کہ وہ آئین اور قانون پر یقین رکھتے ہیں، تاہم اگر انہیں جینے نہ دیا گیا تو وہ بھی ’’جینے نہیں دیں گے‘‘۔

ضلع صوابی کے علاقے ٹوپی میں بس اسٹینڈ کی افتتاحی تقریب سے خطاب میں انہوں نے خبردار کیا کہ انہیں دیوار سے لگانے کی کوشش نہ کی جائے۔ ان کے مطابق عمران خان، جو ملک کے سابق وزیراعظم ہیں، ان کے ساتھ ناروا سلوک ہو رہا ہے اور جیل مینوئل کے باوجود اہلِ خانہ اور وزیر اعلیٰ خیبرپختونخوا کو ملاقات کی اجازت نہیں دی جا رہی۔

انہوں نے کہا کہ خیبرپختونخوا پہلے ہی جنگوں کا سب سے زیادہ بوجھ اٹھا چکا ہے، اور اب علاقے میں ’’ایک نئی جنگ کی بنیاد رکھی جا رہی ہے‘‘، جسے وہ کسی صورت برداشت نہیں کریں گے۔ ان کے مطابق جنگوں نے صوبے کے کاروبار اور گھروں کو تباہ کر دیا ہے، جب کہ سرمایہ رکھنے والے لوگ اپنا کاروبار کہیں اور منتقل کر چکے ہیں۔

اسد قیصر کا کہنا تھا کہ افغانستان کے ساتھ جنگ نہیں، سفارت کاری اور تجارت ہی خیبرپختونخوا کی ضرورت ہے۔ انہوں نے عالمی برادری سے مطالبہ کیا کہ خطے کے امن کے لیے جاری کوششیں جاری رکھی جائیں۔