بانی پی ٹی آئی کا درس امن کا ہے، ہم پرامن ہیں: اسد قیصر

پاکستان تحریک انصاف (PTI) کے سینئر رہنما اور سابق سپیکر قومی اسمبلی اسد قیصر نے صوابی کے علاقے ترکئی میں ایک عوامی جلسے سے خطاب کرتے ہوئے کہا ہے کہ پارٹی کے بانی عمران خان نے ملک میں آزاد عدلیہ، عوام کے حقیقی اختیار، آزاد خارجہ پالیسی اور کرپشن کے خاتمے کے لیے 30 سال جدوجہد کی اور 4 لانگ مارچ کیے۔ ان کا کہنا تھا کہ پارٹی قیادت اور کارکنان پر بے شمار جھوٹے مقدمات، شدید فسطائیت اور سختیاں کی گئیں لیکن پوری پارٹی بانی پی ٹی آئی کے نظریے کے ساتھ مضبوطی سے کھڑی ہے۔

اسد قیصر نے وفاقی و پنجاب حکومت کی پالیسیوں پر شدید تنقید کرتے ہوئے کہا کہ پنجاب انتظامیہ نے خیبر پختونخوا کے لیے آٹے کی سپلائی پر پابندی عائد کر رکھی ہے جبکہ ملک میں مہنگائی اور بے روزگاری کا سیلاب آیا ہوا ہے۔ وزیراعظم شہباز شریف کے غیر ملکی دوروں پر سوال اٹھاتے ہوئے انہوں نے کہا کہ عوام کو ریلیف ملنے کے بجائے پیٹرول اور بنیادی اشیائے خورونوش کی قیمتیں آسمان سے باتیں کر رہی ہیں۔ انہوں نے واضح کیا کہ تحریک انصاف کی جدوجہد پرامن ہے، کارکنان کو اشتعال انگیزی سے دور رہنے کی ہدایت کی گئی ہے اور وزیراعلیٰ خیبر پختونخوا کی جانب سے پیش کردہ مطالبات ہی دراصل پوری پارٹی کے متفقہ مطالبات ہیں۔