اینکر ربیعہ احسن قتل کیس میں گرفتار ملزم کا 4 روزہ جسمانی ریمانڈ منظور

راولپنڈی کی عدالت نے معروف خاتون اینکر ربیعہ احسن کے قتل کے کیس میں گرفتار شوہر احسن طاہر کا مزید 4 روزہ جسمانی ریمانڈ منظور کر لیا ہے۔ ملزم کو ایک دن کا ابتدائی ریمانڈ ختم ہونے پر سینئر سول جج راولپنڈی محمد نصراللہ وٹو کی عدالت میں دوبارہ پیش کیا گیا۔ تفتیشی افسر کی جانب سے مقدمے کی مزید چھان بین کے لیے 10 روزہ جسمانی ریمانڈ کی استدعا کی گئی تھی، تاہم عدالت نے پولیس کو 4 دن کا ریمانڈ دیتے ہوئے ہدایت کی کہ تفتیش مکمل کر کے ملزم کو 13 نومبر کو دوبارہ پیش کیا جائے۔ عدالت نے آئندہ سماعت پر مقدمے کی مکمل تفتیشی رپورٹ اور پوسٹ مارٹم رپورٹ بھی طلب کر لی ہے۔ سماعت کے دوران ملزم کی جانب سے کوئی وکیل پیش نہیں ہوا، جس کے بعد پولیس ملزم کو تفتیش کے لیے تھانے منتقل کر گئی۔