اوگرا کی نگرانی سے قیمتوں کے تعین میں شفافیت آئے گی: علی پرویز ملک

وفاقی وزیر پٹرولیم علی پرویز ملک نے کہا ہے کہ حکومت نے پٹرولیم سیکٹر میں وسیع تر اصلاحات کے تحت آئل اینڈ گیس ریگولیٹری اتھارٹی (اوگرا) کو روزانہ کی بنیاد پر پٹرولیم مصنوعات کی قیمتوں کے تعین کا اختیار دینے کا فیصلہ کیا ہے، جس سے قیمتوں کے عمل میں مکمل شفافیت آئے گی۔ دنیا ٹی وی کے معروف پروگرام ’بات نکلے گی‘ میں خصوصی گفتگو کرتے ہوئے وفاقی وزیر نے واضح کیا کہ حکومت ابھی مکمل ڈی ریگولیشن کی طرف نہیں گئی بلکہ یہ اس سمت میں پہلا قدم ہے۔ ان کا کہنا تھا کہ پٹرولیم سیکٹر میں اچھی اور مثبت تبدیلیوں کے لیے ہمیشہ چیلنجز کا سامنا کرنا پڑتا ہے، تاہم موجودہ حکومت پاکستان اور ریاست کے وسیع تر مفاد میں بہترین فیصلے کرنے کے لیے پرعزم ہے۔

علی پرویز ملک نے مزید بتایا کہ وفاقی کابینہ نے تمام پہلوؤں اور ملکی صورتحال پر تفصیلی غور و خوض کرنے کے بعد ہی اس اہم اقدام کی منظوری دی ہے۔ انہوں نے یقین دہانی کرائی کہ اوگرا قیمتوں کی ڈی ریگولیشن سے متعلق تمام معاملات کی سخت نگرانی کرے گی تاکہ عوام تک شفاف طریقے سے ریلیف پہنچ سکے۔ دورانِ گفتگو وفاقی وزیر پٹرولیم نے سخت وارننگ جاری کرتے ہوئے واضح کیا کہ نئی پالیسی کے نفاذ کے بعد اگر کوئی بھی عنصر یا ڈیلر پٹرولیم مصنوعات کی ذخیرہ اندوزی میں ملوث پایا گیا، تو اس کے خلاف قانون کے مطابق بلاامتیاز اور انتہائی سخت کارروائی عمل میں لائی جائے گی۔