پاکستان اور سعودی عرب میں معدنیات و کان کنی میں دوطرفہ تعاون پر اتفاق

ریاض میں وفاقی وزیر پٹرولیم علی پرویز ملک نے پاکستانی وفد کی قیادت کرتے ہوئے فیوچر منرلز فورم 2026 میں شرکت کی۔ اس موقع پر انہوں نے سعودی عرب کے وزیر صنعت و معدنی وسائل بندر ابراہیم الخریف سے ملاقات کی، جس میں معدنیات اور کان کنی کے شعبے میں دوطرفہ تعاون کو مزید مضبوط بنانے پر اتفاق کیا گیا۔

سعودی وزیر معدنیات نے کہا کہ معدنی شعبے میں پاکستان اور سعودی عرب کے درمیان تعاون کے وسیع مواقع موجود ہیں اور سعودی عرب اپنی علمی و تکنیکی مہارت کے ذریعے پاکستان کی معدنی ترقی میں مدد فراہم کرے گا۔ وزیر پٹرولیم علی پرویز ملک نے کہا کہ ٹیٹھیان بیلٹ میں بے پناہ معدنی صلاحیت موجود ہے، اور جیولوجیکل سروے آف پاکستان سعودی جیولوجیکل سروے کے ساتھ تعاون کر رہا ہے۔

علی پرویز ملک نے مزید کہا کہ کھاد کی پیداوار اور طبی آلات کی تیاری کے شعبے بھی مشترکہ منصوبوں کے لیے اہم مواقع فراہم کرتے ہیں۔ سعودی سفیر نواف بن سعید المالکی نے وزیرِاعظم اور وزیر پٹرولیم کی قیادت کی تعریف کرتے ہوئے کہا کہ فورم میں پاکستان کی موجودگی دوطرفہ تعلقات کو مزید مضبوط کرے گی۔