شرجیل میمن سندھ حکومت کی ناکامیوں سے توجہ ہٹانے کی کوشش کر رہے ہیں: علی خورشیدی

اپوزیشن لیڈر سندھ اسمبلی علی خورشیدی نے صوبائی وزیر شرجیل میمن کے حالیہ بیان پر سخت ردِعمل دیتے ہوئے کہا ہے کہ وہ ماضی کے الزامات کی آڑ میں سندھ حکومت کی موجودہ ناکامیوں سے عوام کی توجہ ہٹانے کی ناکام کوشش کر رہے ہیں۔ انہوں نے شرجیل میمن کو مشورہ دیا کہ وہ ایم کیو ایم پر تنقید کرنے کے بجائے پیپلز پارٹی کی صوبائی حکومت کی سترہ سالہ کارکردگی کا حساب دیں۔ ان کا کہنا تھا کہ پونے دو دہائیوں سے اقتدار پر براجمان حکمرانوں کو اپنی ہر ناکامی کا ملبہ ماضی پر ڈالنے کا کوئی سیاسی یا اخلاقی حق حاصل نہیں۔

علی خورشیدی نے سندھ حکومت سے سوال کیا کہ اگر تمام خرابیوں کی وجہ ماضی ہی ہے تو پچھلے 17 سالوں میں سندھ حکومت نے کراچی کے بنیادی مسائل کیوں حل نہیں کیے؟ انہوں نے مزید کہا کہ حکومت بتائے کہ اس نے کراچی کی معیشت، انڈسٹری اور سرمایہ کاری کے فروغ کے لیے اب تک کیا عملی اقدامات کیے ہیں؟ ان کا کہنا تھا کہ کاغذی دعوؤں کے بجائے حکمران کراچی کے انفراسٹرکچر کی زبوں حالی اور شہریوں کی بدحالی کا جواب دیں، کیونکہ عوام اب کھوکھلے بیانات سے مطمئن ہونے والے نہیں ہیں۔