علیمہ خان کیس میں نیا قانونی موڑ؛ پراسیکیوشن کا دفاعی گواہ پر بڑا اعتراض،سماعت 9 جولائی تک ملتوی کر دی

راولپنڈی کی انسدادِ دہشت گردی عدالت میں علیمہ خان کے خلاف 26 نومبر کے احتجاج سے متعلق درج مقدمے کی اہم سماعت ہوئی، جس میں پراسیکیوشن نے ان کے دفاعی گواہ پر بڑا قانونی اعتراض اٹھا دیا۔ دورانِ سماعت پراسیکیوٹر ظہیر شاہ نے مؤقف اختیار کیا کہ اگر ملزم خود دفعہ 340/2 کے تحت بطور گواہ پیش نہ ہو، تو وہ کسی دوسرے شخص کی گواہی پیش نہیں کر سکتا۔ انہوں نے لاہور ہائی کورٹ کے جسٹس امجد رفیق کے ایک فیصلے کا حوالہ دیتے ہوئے کہا کہ اعلیٰ عدلیہ کے مطابق ایسی دفاعی شہادت قانوناً ناقابلِ قبول ہوگی۔ پراسیکیوٹر نے مزید کہا کہ علیمہ خان نے دفعہ 342 کے سوالنامے میں خود بطور گواہ پیش ہونے سے انکار کیا ہے اور کوئی تحریری بیانِ برحلف بھی جمع نہیں کرایا، اس لیے گزشتہ سماعت پر ان کے نامزد کردہ دفاعی گواہ فتح اللہ برکی کی قانونی حیثیت ختم ہو جاتی ہے۔ اس اعتراض پر وکیلِ صفائی نے دلائل دینے کے لیے عدالت سے مہلت مانگ لی، جس پر انسدادِ دہشت گردی عدالت کے جج امجد علی شاہ نے سماعت 9 جولائی تک ملتوی کر دی۔