شرپسند عناصر کو کسی قسم کی رعایت نہیں دی جائے گی: ترجمان آزاد کشمیر پولیس

ترجمان آزاد کشمیر پولیس ایس ایس پی خاور علی شوکت نے راولاکوٹ میں نیوز کانفرنس کرتے ہوئے کہا ہے کہ آزاد کشمیر کے امن کو متاثر کرنے والے شرپسند عناصر کو کسی قسم کی رعایت نہیں دی جائے گی۔ انہوں نے بتایا کہ مسلح حملہ آور شہر کی عمارتوں پر مورچہ بند ہیں اور ان کے تانے بانے باہر سے ملتے ہیں، جبکہ شرپسندوں کے حملے میں رینجرز کا 1 اہلکار شہید ہوا ہے۔ ایس ایس پی نے انکشاف کیا کہ پولیس اور قانون نافذ کرنے والے اداروں نے متعدد شرپسندوں کو گرفتار کر کے ان سے جدید اسلحہ برآمد کر لیا ہے، جبکہ سوشل میڈیا پر ریاست مخالف منفی پروپیگنڈا بھی کیا جا رہا ہے۔ انہوں نے واضح کیا کہ اداروں کے تحمل کو کمزوری نہ سمجھا جائے اور سیکیورٹی فورسز پر حملہ کرنے والوں سے آہنی ہاتھوں سے نمٹا جائے گا۔