کالعدم انتشاری کمیٹی کے مسلح جتھوں کے حملوں کے ناقابلِ تردید شواہد

آزاد جموں و کشمیر کے امن و امان کو سبوتاژ کرنے کے درپے کالعدم ایکشن (انتشاری) کمیٹی کا اشتعال انگیز اور پرتشدد ایجنڈا ہر گزرتے دن کے ساتھ بے نقاب ہوتا جا رہا ہے۔ عوامی حقوق کی آڑ لے کر معصوم شہریوں کو گمراہ کرنے والے اس گروہ کے مسلح جتھوں کی جانب سے عام شہریوں، پولیس اور رینجرز سمیت قانون نافذ کرنے والے اداروں پر بھاری اور جدید اسلحے سے براہِ راست فائرنگ کرنے کے متعدد ویڈیو شواہد منظرِ عام پر آ گئے ہیں۔

کالعدم کمیٹی کے مسلح عناصر اب تک قانون نافذ کرنے والے اداروں کے متعدد اہلکاروں کو شہید اور زخمی کر چکے ہیں، جبکہ ان شرپسندوں نے سی ایم ایچ (CMH) سمیت کئی سرکاری و نجی املاک، ہسپتالوں اور گاڑیوں کو بھی نذرِ آتش کیا۔ معصوم عوام کو بطور ڈھال استعمال کرنے والا یہ گروہ کاروباری طبقے کو جبری دکانیں بند کرنے پر مجبور کر رہا ہے اور انکار کرنے والے عام شہریوں کو شدید تشدد اور دھمکیوں کا نشانہ بنا رہا ہے۔

دفاعی اور سیاسی ماہرین کے مطابق، عوامی حقوق کی بات کرنے والوں کے ہاتھوں میں جدید ترین ہتھیاروں کی موجودگی کھلی غنڈہ گردی اور دہشت گردی ہے، جو اس بات کا منہ بولتا ثبوت ہے کہ یہ بیرونی ایجنڈے پر کام کرنے والا انتشاری ٹولہ کبھی عوام کا ہمدرد نہیں ہو سکتا۔ ماہرین کا کہنا ہے کہ کشمیر کے پُر امن ماحول کو بچانے اور شہریوں کے جان و مال کے تحفظ کے لیے اس کالعدم کمیٹی کے مسلح کارندوں کے خلاف اب آہنی ہاتھوں سے نمٹنا انتہائی ناگزیر ہو چکا ہے۔