ایمل ولی خان کی فضل الرحمان سے ملاقات، امن و امان کی صورتحال پر تشویش

عوامی نیشنل پارٹی (اے این پی) کے مرکزی صدر سینیٹر ایمل ولی خان نے ایک اعلیٰ سطحی وفد کے ہمراہ جمعیت علمائے اسلام (جے یو آئی-ایف) کے سربراہ مولانا فضل الرحمان سے ان کی رہائش گاہ پر اہم ملاقات کی ہے۔ ملاقات کے دوران ملک کی مجموعی سیاسی صورتحال سمیت بالخصوص خیبرپختونخوا اور بلوچستان میں امن و امان کی دگرگوں صورتحال پر تفصیلی تبادلہ خیال کیا گیا۔ دونوں جماعتوں کے رہنماؤں نے دونوں صوبوں میں سیکیورٹی کی بگڑتی ہوئی صورتحال پر گہری تشویش کا اظہار کرتے ہوئے موجودہ ملکی حالات پر پارلیمنٹ میں ‘ان کیمرہ بریفنگ’ کی اہمیت اور ضرورت پر مکمل اتفاق کیا۔ رہنماؤں نے اس عزم کا اظہار کیا کہ عوام کے جان و مال کے تحفظ اور خطے میں پائیدار امن کے قیام کے لیے حکومت کی جانب سے سنجیدہ، ٹھوس اور مؤثر اقدامات اٹھانا ناگزیر ہو چکا ہے۔