افغان طالبان رجیم کی سرپرستی میں سرحد پار دہشتگردی کے شواہد پھر سامنے آگئے

افغان طالبان رجیم کی سرپرستی میں افغان سرزمین سے سرحد پار دہشت گردی کی پشت پناہی کے ناقابل تردید شواہد ایک بار پھر عالمی سطح پر سامنے آگئے ہیں۔ پاک فوج کی جانب سے افغانستان کی سرحد کے اندر دہشت گردوں کے مضبوط ٹھکانوں کی تباہی اور ان میں ہونے والی ہلاکتوں کی عالمی اداروں اور بین الاقوامی ماہرین نے بھی باقاعدہ تصدیق کر دی ہے۔

عالمی جریدے ‘دی پالیسی ڈائیجسٹ’ (The Policy Digest) کی ایک خصوصی رپورٹ کے مطابق امریکی خفیہ ایجنسی (CIA) کی سابق ٹارگٹنگ افسر سارہ ایڈمز نے افغانستان میں کالعدم تنظیموں اور دہشت گردوں کے مراکز کی موجودگی اور ان کے خلاف پاکستان کی کارروائیوں کی تصدیق کی ہے۔ سارہ ایڈمز کا کہنا ہے کہ مشرقی افغان صوبوں پکتیکا اور کنڑ میں تین اہم دہشت گرد مراکز پر پاک فوج کے درست اور انتہائی مؤثر حملوں میں ‘فتنہ الخوارج’ (ٹی ٹی پی) کے 19 دہشت گرد ہلاک اور 11 سے زائد شدید زخمی ہوئے۔

رپورٹ میں مزید انکشاف کیا گیا ہے کہ 21 ستمبر کو کی جانے والی اس کارروائی میں خودکش بمباروں کی تربیت گاہ، دہشت گردی کی سہولت کاری کا مرکز اور ‘فتنہ الخوارج’ و ‘داعش’ کا مشترکہ سیف ہاؤس مکمل طور پر تباہ کر دیا گیا۔ بین الاقوامی تحقیقاتی رپورٹس اور امریکی انٹیلی جنس ماہرین کی جانب سے افغان سرزمین پر قائم دہشت گردوں کے نیٹ ورک اور ان کے خلاف کارروائی کی تصدیق نے اسلام آباد کے اس موقف کو مضبوطی سے ثابت کر دیا ہے کہ افغان طالبان رجیم دہشت گردوں کو محفوظ پناہ گاہیں فراہم کر رہی ہے۔