محمود خان اچکزئی کا عمران خان سے ملاقات نہ کرانے پر سوال، قوم سے آئین کیلئے کھڑے ہونے کی اپیل

اپوزیشن اتحاد کے سربراہ محمود خان اچکزئی نے بانی پی ٹی آئی عمران خان سے ملاقات نہ کروانے پر گہری تشویش ظاہر کرتے ہوئے سوال اٹھایا ہے کہ آخر عمران خان نے ایسا کیا کیا ہے کہ انہیں ملنے نہیں دیا جا رہا؟

محمود اچکزئی کا کہنا تھا کہ پارلیمنٹ میں آنے والے نمائندے اپنا اسپیکر اور وزیراعظم خود منتخب کرتے ہیں، اسی لیے ہم کہتے ہیں کہ فیصلے 25 کروڑ عوام کی منتخب پارلیمان ہی کرے۔ انہوں نے کہا کہ وقت آگیا ہے کہ عوام آئین کے لیے کھڑے ہوں۔ “میں پاکستان کے لوگوں سے درخواست کرتا ہوں کہ باہر نکلو، پارلیمنٹ کے اندر بھی اور باہر بھی ہمیں اپنی آواز بلند کرنا ہوگی۔”

تحریک انصاف کے رہنما اسد قیصر نے بھی حکومت پر تنقید کرتے ہوئے کہا کہ ہری پور میں عوام کا بنیادی حق چھینا گیا، ہم سے ووٹ کا اختیار لے لیا گیا۔ انہوں نے وکلا برادری سے سوال کیا کہ کیا یہی آئین کی عزت ہے؟

اسد قیصر کا کہنا تھا کہ تمام سیاسی جماعتیں اپنی انا سے باہر نکلیں۔ پشاور میں پاکستان کا سب سے بڑا جرگہ ہوا، مگر اس کی قرارداد کو آج تک اہمیت نہیں دی جا رہی، جو انتہائی افسوسناک ہے۔