کسی قانون کو نہیں مانتا، ہر ملک میں فوجی کارروائی کرنے کے لیے آزاد ہیں: ٹرمپ

امریکی صدر ڈونلڈ ٹرمپ نے کہا ہے کہ دنیا کے تمام ممالک پر امریکی فوجی کارروائی کا اختیار ان کے پاس ہے اور انہیں کسی عالمی قانون کی پابندی حاصل نہیں، بلکہ صرف ان کی اپنی اخلاقیات ہی وہ واحد حد ہیں جو انہیں روکتی ہیں۔

نیویارک ٹائمز کو دیے گئے ایک انٹرویو میں صدر ٹرمپ نے واضح کیا کہ ان کے فیصلے بین الاقوامی قوانین سے مشروط نہیں ہوتے۔ ان کا کہنا تھا کہ امریکا کی قومی سلامتی اور مفادات کے تحفظ کے لیے وہ کسی بھی ملک میں فوجی کارروائی کرنے کے لیے آزاد ہیں۔
صدر ٹرمپ کے مطابق، ’’میری اپنی اخلاقیات اور میرا اپنا فیصلہ ہی وہ چیز ہے جو مجھے روکتی ہے، میں کسی عالمی قانون کو نہیں مانتا۔‘‘

انہوں نے کہا کہ طاقتور اقدامات اور فوجی کارروائیاں امریکا کے عالمی مفادات کے تحفظ میں مدد دیتی ہیں۔ صدر ٹرمپ نے گرین لینڈ اور وینزویلا کی مثالیں دیتے ہوئے کہا کہ امریکی طاقت کے استعمال سے وہ عالمی سطح پر اپنے ملک کے مفادات کو مزید مضبوط بنا سکتے ہیں۔

امریکی صدر کا کہنا تھا کہ بعض اوقات بین الاقوامی قانون پر عمل ضروری محسوس ہوتا ہے، تاہم اس کا انحصار اس بات پر ہے کہ اس قانون کی تعریف کس طرح کی جاتی ہے۔ انہوں نے زور دیا کہ حتمی فیصلہ ہمیشہ اخلاقیات کی بنیاد پر ہونا چاہیے۔

اسی انٹرویو میں ڈونلڈ ٹرمپ نے وینزویلا کے معاملات ایک سال سے زائد عرصے تک چلانے اور اس کے تیل پر کنٹرول رکھنے کے عزائم کا بھی اظہار کیا۔

یہ بیان ایسے وقت میں سامنے آیا ہے جب امریکی فوجی آپریشنز اور عالمی تعلقات کے حوالے سے دنیا بھر میں بحث جاری ہے۔ صدر ٹرمپ نے ایک بار پھر واضح کیا کہ عالمی طاقت کے استعمال کے معاملے میں انہیں مکمل آزادی حاصل ہے اور وہ صرف اپنی اخلاقیات کو مدنظر رکھتے ہیں۔