مشرق وسطیٰ میں پائیدار سلامتی باہر سے مسلط نہیں کی جا سکتی، عباس عراقچی

ایران کے وزیرِ خارجہ عباس عراقچی نے زور دے کر کہا ہے کہ مشرقِ وسطیٰ میں پائیدار سلامتی باہر سے مسلط نہیں کی جا سکتی، بلکہ خطے کا پائیدار امن غیر ملکی مداخلت کے بغیر علاقائی ممالک کی باہمی بات چیت اور مشترکہ حکمتِ عملی سے ہی ممکن ہے۔ انڈونیشیا میں منعقدہ گلوبل ڈائیلاگ فورم سے آن لائن خطاب کرتے ہوئے عباس عراقچی نے کہا کہ خطے کے ممالک کو اپنے استحکام، ترقی اور مستقبل کے فیصلوں کے لیے آپس میں مذاکرات کرنے چاہئیں اور بیرونی طاقتوں کے اثر و رسوخ کے بغیر مسائل کا حل تلاش کرنا چاہیے۔

ایرانی وزیرِ خارجہ نے کہا کہ مشرقِ وسطیٰ میں دہائیوں پر محیط غیر ملکی مداخلت، عسکری دباؤ اور مسلسل جنگوں نے یہ ثابت کر دیا ہے کہ فوجی طاقت کے استعمال سے کبھی سلامتی پیدا نہیں ہوتی اور نہ ہی جبر سے امن قائم کیا جا سکتا ہے۔ عالمی نظام پر تنقید کرتے ہوئے عباس عراقچی کا کہنا تھا کہ جب بڑی طاقتوں کے مفادات کے تحت بین الاقوامی قوانین کو پسِ پشت ڈال دیا جائے تو پھر ‘قانون کی حکمرانی’ کی کوئی اہمیت باقی نہیں رہتی۔ انہوں نے مزید کہا کہ اگر انسانی حقوق کو چند قوموں کا فطری حق اور دیگر کے لیے مشروط رعایت بنا دیا جائے تو انہیں عالمگیر انسانی حقوق قرار نہیں دیا جا سکتا۔