یوکرینی صدر زیلنسکی امریکی صدر ٹرمپ سے ملاقات کیلئے فلوریڈا پہنچ گئے

یوکرین کے صدر ولودومیر زیلنسکی امریکی صدر ڈونلڈ ٹرمپ سے ملاقات کے لیے امریکی ریاست فلوریڈا پہنچ گئے،  امریکی صدر ٹرمپ نے زیلنسکی کا استقبال کیا۔

میڈیا سے گفتگو کرتے ہوئے صدر ٹرمپ نے کہا کہ ان کے خیال میں روسی صدر ولادیمیر پیوٹن امن کے لیے سنجیدہ ہیں اور یوکرین و روس دونوں ہی امن معاہدے کے خواہاں ہیں۔ ان کا کہنا تھا کہ آج ہونے والی ملاقات مثبت اور نتیجہ خیز ثابت ہوگی۔

امریکی صدر نے مزید بتایا کہ زیلنسکی سے ملاقات کے بعد وہ صدر پیوٹن سے ٹیلیفون پر بات کریں گے جبکہ یورپی رہنماؤں سے بھی رابطہ کیا جائے گا۔

صدر ٹرمپ کے مطابق آج کی بات چیت میں سیکیورٹی معاہدے اور یوکرین کے لیے معاشی فوائد سے متعلق امور بھی شامل ہوں گے۔ انہوں نے کہا کہ یوکرین میں امن کے قیام کے لیے مذاکرات آخری مراحل میں داخل ہو چکے ہیں۔