ڈاکٹر یاسمین راشد کی طبیعت بگڑ گئی، ہسپتال منتقلی کیلئے عدالت میں درخواست دائر

لاہور کی انسدادِ دہشتگردی کی خصوصی عدالت میں پاکستان تحریک انصاف (پی ٹی آئی) کی سینئر رہنما ڈاکٹر یاسمین راشد کو شدید علالت کے باعث کوٹ لکھپت جیل سے ہسپتال منتقل کرنے کے لیے باضابطہ درخواست دائر کر دی گئی ہے، جو ان کے وکیل رانا مدثر ایڈووکیٹ کی جانب سے عدالت میں جمع کرائی گئی ہے۔

دائر کردہ درخواست میں مؤقف اختیار کیا گیا ہے کہ ڈاکٹر یاسمین راشد 10 مئی 2023ء سے مختلف مقدمات میں قید ہیں اور وہ پہلے ہی کینسر اور دمے جیسے موذی و پیچیدہ امراض میں مبتلا ہیں۔ درخواست کے مطابق لاہور میں شدید سموگ کی موجودہ لہر کے باعث ان کی طبیعت انتہائی خراب ہو چکی ہے، جبکہ جیل انتظامیہ کی جانب سے ان کے بنیادی انسانی و قانونی حقوق بھی سلب کیے جا رہے ہیں۔

درخواست میں مزید بتایا گیا ہے کہ ماہر ڈاکٹروں نے ڈاکٹر یاسمین راشد کی صحت یابی کے لیے انہیں فوری طور پر ہائیڈرو تھراپی اور فزیو تھراپی تجویز کی ہے، تاہم کوٹ لکھپت جیل میں قید ہونے کے باعث ان کا مناسب اور بروقت علاج معالجہ ممکن نہیں ہو پا رہا۔

درخواست گزار نے عدالت کی توجہ اس جانب مبذول کرائی کہ ڈاکٹر یاسمین راشد کی آخری ایم آر آئی (MRI) رپورٹ میں ان کی ریڑھ کی ہڈی میں سنگین نوعیت کے طبی مسائل کی نشاندہی ہوئی ہے، جس پر ڈاکٹروں نے فوری آپریشن کا مشورہ بھی دے رکھا ہے۔ درخواست میں کہا گیا ہے کہ جیل کی حدود میں ان کا آپریشن کسی صورت ممکن نہیں، جبکہ اس سے قبل جاری ہونے والے واضح عدالتی حکم کے باوجود جیل حکام نے تاحال انہیں ہسپتال منتقل نہیں کیا۔

آخر میں درخواست گزار وکیل نے عدالت سے استدعا کی ہے کہ ڈاکٹر یاسمین راشد کی بگڑتی ہوئی صحت اور جان کو لاحق خطرات کے پیشِ نظر انہیں فوری طور پر کوٹ لکھپت جیل سے سرکاری ہسپتال منتقل کر کے علاج معالجے کی تمام مناسب سہولیات فراہم کرنے کا حکم دیا جائے۔