ٹی فائیو پاور پراجیکٹ کی تعمیر: تربیلہ ڈیم سے پانی کے اضافی اخراج کا فیصلہ

خیبر پختونخوا کے ضلع ہری پور میں زیرِ تعمیر ٹی فائیو (T5) پاور پراجیکٹ کے تعمیراتی کام کے دوران تربیلہ ڈیم سے پانی کا اضافی اخراج کیا جائے گا، جس کے باعث دریائے سندھ میں پانی کی سطح معمول سے کافی بلند ہونے کا امکان ظاہر کیا گیا ہے۔

اس حوالے سے اسسٹنٹ کمشنر غازی جنید آفتاب نے تفصیلات بتاتے ہوئے کہا کہ آج تربیلہ ڈیم سے پانی کا مجموعی اخراج ڈیڑھ لاکھ کیوسک سے تجاوز کر جائے گا۔ ان کا کہنا تھا کہ پانی کے اس ممکنہ اضافی بہاؤ کے پیشِ نظر ڈیم کے کنارے اور نشیبی علاقوں میں آباد شہریوں کو محفوظ مقامات پر منتقل ہونے کے لیے باقاعدہ اعلانات شروع کر دیے گئے ہیں، جبکہ مقامی آبادی کو دریائے سندھ اور ڈیم کے اطراف غیر ضروری نقل و حرکت سے مکمل گریز کرنے کی سخت ہدایت کی گئی ہے۔

دوسری جانب ضلعی انتظامیہ نے حفاظتی اقدامات کے تحت ڈیم اور دریا میں کشتی رانی اور نہانے پر فوری پابندی عائد کر دی ہے، جبکہ مقامی کسانوں اور مویشی پال حضرات کو بھی خبردار کیا گیا ہے کہ وہ کسی بھی جانی و مالی نقصان اور ناخوشگوار واقعے سے بچنے کے لیے اپنے مال مویشیوں کو دریا کے کناروں سے دور رکھیں۔