وادی لیپہ میں عالمی یوم ذیابیطس کے موقع پر پاک فوج کے زیراہتمام خصوصی آگاہی تقریب

وادی لیپہ میں عالمی یومِ ذیابیطس کے موقع پر پاک فوج کے زیراہتمام ایک خصوصی آگاہی تقریب کا انعقاد کیا گیا، جس میں علاقے کے مختلف شعبہ ہائے زندگی سے تعلق رکھنے والے شہریوں، اسکول و کالج کے طلبہ اور اساتذہ کی بڑی تعداد نے بھرپور شرکت کی۔

اس آگاہی تقریب کے انعقاد کا بنیادی مقصد مقامی عوام کو ذیابیطس (شوگر) جیسی خاموش بیماری کی ابتدائی علامات، اس کے پھیلاؤ کی وجوہات اور اس سے بچاؤ کی ضروری احتیاطی تدابیر سے مؤثر انداز میں روشناس کرانا تھا۔ تقریب سے خطاب کرتے ہوئے ماہرین اور مقررین نے متوازن غذا کے استعمال، باقاعدہ جسمانی ورزش اور صحت مند طرزِ زندگی کو اپنانے کو ذیابیطس سے بچاؤ کے لیے ناگزیر قرار دیا۔

تقریب کے اختتام پر ذیابیطس سے بچاؤ اور حفاظتی تدابیر سے متعلق عوامی شعور اجاگر کرنے کے لیے ایک خصوصی آگاہی واک کا بھی اہتمام کیا گیا۔ تقریب اور واک کے شرکاء نے دوردراز پہاڑی علاقے میں صحتِ عامہ سے متعلق اس طرح کی مفید اور تعمیری آگاہی سرگرمیوں کے انعقاد پر پاک فوج کی کاوشوں کو بھرپور انداز میں سراہا۔