دریائے مسیسیپی میں آئل ٹینکر کے ساتھ تصادم کے بعد تفریحی کشتی ڈوب گئی

امریکی ریاست لوزیانا کے شہر نیواورلینز میں دریائے مسیسیپی کے اندر ایک خوفناک حادثے کے دوران آئل ٹینکر لنگر انداز تفریحی کشتی سے ٹکرا گیا، جس کے نتیجے میں تفریحی کشتی پانی میں ڈوب گئی۔

امریکی میڈیا رپورٹس کے مطابق حادثے کے وقت مذکورہ تفریحی کشتی پر مجموعی طور پر 129 مسافر سوار تھے۔ یہ کشتی اس وقت بندرگاہ پر لنگر انداز تھی کہ اچانک ایک بڑا آئل ٹینکر بے قابو ہو کر اس سے جا ٹکرایا، جس کی زد میں آ کر کشتی کو شدید نقصان پہنچا اور وہ پانی میں غرق ہو گئی۔

حادثے کی اطلاع ملتے ہی مقامی انتظامیہ اور ریسکیو ادارے فوری طور پر جائے وقوعہ پر پہنچ گئے اور ڈوبنے والے مسافروں کی تلاش اور امداد کے لیے فوری طور پر ریسکیو آپریشن کا آغاز کر دیا گیا۔ حکام کے مطابق تاحال حادثے کے نتیجے میں کسی جانی نقصان یا مسافروں کی طبی حالت سے متعلق کوئی باضابطہ تفصیلات سامنے نہیں آ سکی ہیں۔