محمد علی درانی نے چھوٹے صوبوں کا قیام ناگزیر قرار دے دیا

سابق وفاقی وزیر محمد علی درانی نے اوکاڑہ میں ایک تقریب اور گفتگو کے دوران کہا ہے کہ ملک کی ترقی اور مسائل کے مستقل حل کے لیے نئے چھوٹے صوبوں کا قیام وقت کی اہم ترین ضرورت بن چکا ہے۔

محمد علی درانی کا کہنا تھا کہ ملک میں مضبوط اور بااختیار مقامی حکومتوں کے قیام کے بغیر حقیقی ترقی کا خواب شرمندۂ تعبیر نہیں ہو سکتا۔ انہوں نے موجودہ حکومتی ڈھانچے پر تنقید کرتے ہوئے کہا کہ ریاست کے وسائل عام عوام کی فلاح و بہبود کے بجائے مراعات یافتہ حکمرانوں پر خرچ ہو رہے ہیں، جبکہ آج کا عام پاکستانی ملک میں حقیقی اور نچلی سطح پر تبدیلی کا خواہاں ہے۔

سابق وفاقی وزیر نے یاد دلایا کہ بہاولپور صوبے کے قیام کا باضابطہ مطالبہ سب سے پہلے انہوں نے اٹھایا تھا، اور افسوس کا اظہار کیا کہ ہمیشہ سے بہاولپور اور جنوبی پنجاب کے عوام کے ساتھ سوتیلوں جیسا سلوک روا رکھا گیا ہے۔ انہوں نے دوٹوک الفاظ میں کہا کہ جنوبی پنجاب، بہاولپور اور ہزارہ کے علیحدہ صوبے نہ بنانا ایک بڑی سیاسی غلطی ہے جس کا خمیازہ خطے کے پسماندہ عوام بھگت رہے ہیں۔