بھارتی ریاست منی پور میں خونریزی، تشدد کا سلسلہ جاری، فائرنگ سے خاتون ہلاک، دو زخمی

بھارت کی شمال مشرقی ریاست منی پور میں نسلی تشدد اور خونریزی کا سلسلہ تھم نہ سکا، جہاں فائرنگ کے ایک تازہ واقعے میں ایک خاتون ہلاک جبکہ دو شدید زخمی ہو گئیں، جس کے بعد خطے میں کشیدگی ایک بار پھر انتہائی خطرناک سطح پر پہنچ گئی ہے۔

بھارتی میڈیا رپورٹس کے مطابق فائرنگ کے اس افسوسناک واقعے کے خلاف کوکی قبائل کی نمائندہ تنظیم کمیٹی آن ٹرائبل یونٹی (سی او ٹی یو – CoTU) نے ضلع کانگپوکپی (نگپوکپی) میں 48 گھنٹے کی مکمل ہڑتال اور پہیہ جام کا اعلان کر دیا ہے۔ قبائلی تنظیم نے مرکزی اور ریاستی حکومتوں کو شہریوں کے جان و مال کے تحفظ میں مکمل طور پر ناکام قرار دیتے ہوئے علاقے سے تمام مرکزی اور ریاستی سکیورٹی فورسز کی فوری واپسی کا مطالبہ کیا ہے۔

دوسری جانب ریاستی نائب وزیراعلیٰ نے فائرنگ کے اس واقعے کی مذمت کرتے ہوئے واقعے کی فوری اور غیر جانبدارانہ تحقیقات کا مطالبہ کیا ہے۔ سیاسی مبصرین کے مطابق نئی دہلی کی تسلط پسندانہ پالیسیوں اور مقامی آبادی کے بنیادی حقوق سلب کیے جانے کے خلاف بھارت کی شمال مشرقی ریاستوں میں آزادی اور خودمختاری کی تحریکیں مزید شدت اختیار کر گئی ہیں۔

واضح رہے کہ ریاست منی پور میں مئی 2023ء سے شروع ہونے والے نسلی فسادات اور خونریزی میں اب تک سرکاری و غیر سرکاری اعداد و شمار کے مطابق 306 سے زائد افراد ہلاک ہو چکے ہیں جبکہ 49 شہری تاحال لاپتہ ہیں۔ ریاست میں بدترین امن و امان اور انتہائی کشیدہ حالات کے پیشِ نظر منی پور ہائیکورٹ نے بھی مردم شماری کے عمل کو 30 اپریل 2027ء تک مؤخر کرنے اور روکنے کی باضابطہ ہدایت جاری کر دی ہے۔