چینی کی قیمتوں کی مسلسل نگرانی کے ذریعے عوام کو ریلیف دیا جائے: اسحاق ڈار

نائب وزیراعظم اور وزیر خارجہ اسحاق ڈار نے ہدایت کی ہے کہ چینی کی قیمتوں کی مسلسل نگرانی اور مؤثر انتظامی اقدامات کے ذریعے عوام کو ریلیف کی فراہمی یقینی بنائی جائے۔ اسحاق ڈار کی زیر صدارت چینی کی برآمدات سے متعلق اسٹیئرنگ کمیٹی کا اہم اجلاس منعقد ہوا، جس میں ملک میں چینی کی مجموعی دستیابی، مقامی ضروریات اور برآمدات کے درمیان توازن برقرار رکھنے کے طریقہ کار کا تفصیلی جائزہ لیا گیا۔ وزارتِ خارجہ کے ترجمان کے مطابق اجلاس سے خطاب کرتے ہوئے نائب وزیراعظم نے واضح کیا کہ کسانوں کے مفادات کا تحفظ اور عام شہریوں کو مناسب قیمت پر چینی کی بلاتعطل فراہمی حکومت کی اولین ترجیح ہے، جبکہ اجلاس میں اس بات پر بھی زور دیا گیا کہ چینی کی برآمدات سے متعلق تمام فیصلوں میں ملکی کھپت اور صارفین کے مفادات کو ہر صورت مقدم رکھا جائے۔