انتخابی اصلاحات کمیٹی، مسلم لیگ ن نے 11 ارکان کے نام تجویز کر دیئے

انتخابی اصلاحات کمیٹی کے قیام کے معاملے پر مسلم لیگ (ن) نے 11 ارکان کے نام تجویز کر دیے ہیں، جس کے بعد کمیٹی کی باضابطہ تشکیل کی راہ ہموار ہونا شروع ہو گئی ہے۔ ذرائع کے مطابق وزیر برائے پارلیمانی امور ڈاکٹر طارق فضل چودھری نے مجوزہ ارکان کی فہرست نائب وزیراعظم اسحاق ڈار کو ارسال کر دی ہے، جن میں اعظم نذیر تارڑ، اسحاق ڈار اور خود ڈاکٹر طارق فضل چودھری کے نام بھی شامل ہیں، جبکہ نائب وزیراعظم کی حتمی منظوری کے بعد کمیٹی کی تشکیل کا عمل آگے بڑھایا جائے گا۔ ذرائع کا مزید کہنا ہے کہ اس سلسلے میں پاکستان تحریک انصاف کے چیف وہپ عامر ڈوگر سے آئندہ پیر کے روز اہم ملاقات طے پائی ہے جس میں پی ٹی آئی سے بھی کمیٹی کے لیے نام مانگے جائیں گے، اور اپوزیشن جماعت کی جانب سے ناموں کی فراہمی کے بعد انتخابی اصلاحات کمیٹی کا باقاعدہ نوٹیفکیشن جاری کر دیا جائے گا۔