42 کنٹونمنٹ بورڈز میں انتخابات کا معاملہ، الیکشن کمیشن کا تحریری حکم جاری

الیکشن کمیشن آف پاکستان نے ملک کے 42 کنٹونمنٹ بورڈز میں بلدیاتی انتخابات کے انعقاد سے متعلق کیس کا تحریری حکم جاری کرتے ہوئے وزیراعظم آفس کو دوبارہ خط لکھنے اور دو ہفتوں کے اندر جواب جمع کرانے کی ہدایت کر دی ہے۔ تحریری حکم کے مطابق ان 42 کنٹونمنٹ بورڈز کی مدت 11 اپریل 2026ء کو ختم ہو گئی تھی اور قانون کے تحت 8 اگست تک نئے انتخابات کرانا لازم تھے، تاہم کنٹونمنٹ ایکٹ کی دفعہ 19 ڈی کے تحت وفاقی حکومت کی باضابطہ درخواست موصول نہ ہونے کے باعث انتخابات کا انعقاد ممکن نہ ہو سکا۔ الیکشن کمیشن نے واضح کیا ہے کہ حلقہ بندیوں کی حتمی فہرست اپریل میں شائع کی جا چکی ہے جبکہ وزارتِ دفاع کو متعدد خطوط اور چیف الیکشن کمشنر کی جانب سے 16 جولائی کو وزیراعظم کو ڈی او لیٹر بھی ارسال کیا گیا، تاہم وزارتِ دفاع اور ایم ایل اینڈ سی کی آمادگی کے باوجود معاملہ تاحال وزیراعظم آفس میں زیرِ التوا ہے۔ الیکشن کمیشن نے متنبہ کیا ہے کہ مقررہ مدت میں جواب موصول نہ ہونے کی صورت میں کمیشن مناسب حکم جاری کرنے پر مجبور ہوگا، جبکہ کیس کی مزید سماعت تین ہفتے بعد مقرر کر دی گئی ہے۔