جب چاہوں ایران کیخلاف جنگ جیت سکتا ہوں: امریکی صدر کا دعویٰ

امریکی صدر ڈونلڈ ٹرمپ نے دعویٰ کیا ہے کہ واشنگٹن اس وقت ایران کے خلاف جنگ جیتنے کے آخری مراحل میں ہے اور وہ جب چاہیں تہران کے خلاف باضابطہ فتح حاصل کر سکتے ہیں۔

ایک امریکی ٹیلی ویژن کو دیے گئے انٹرویو میں صدر ڈونلڈ ٹرمپ نے سخت گیر مؤقف اپناتے ہوئے کہا کہ امریکا نے ایران کو معاشی اور عسکری طور پر بالکل بے اثر کر دیا ہے۔ انہوں نے دعویٰ کیا کہ شدید امریکی پابندیوں کے باعث ایران میں مہنگائی کی شرح 301 فیصد تک پہنچ چکی ہے، ایرانی معیشت تباہ ہو چکی ہے اور صورتحال یہ ہے کہ اب وہاں فوجیوں کو باقاعدہ تنخواہیں بھی نہیں مل رہیں۔

صدر ٹرمپ نے تہران کو تنبیہ کرتے ہوئے کہا کہ اگر ضرورت پڑی تو انہیں ایران کے خلاف مزید طاقت استعمال کرنے میں کوئی ہچکچاہٹ نہیں ہوگی اور وہ جب چاہیں فیصلہ کن فوجی کارروائی کر سکتے ہیں۔ انہوں نے دعویٰ کیا کہ وینزویلا میں کامیابی حاصل کرنے کے بعد اس وقت خلیج کے بیشتر امور پر بھی واشنگٹن کا مکمل کنٹرول قائم ہے۔

کیوبا کے حوالے سے بات کرتے ہوئے امریکی صدر نے انکشاف کیا کہ وہ کیوبا کے خلاف ایک مختصر فوجی کارروائی پر بھی سنجیدگی سے غور کر رہے ہیں، اور ان کی خواہش ہے کہ وائٹ ہاؤس چھوڑنے سے پہلے وہ اس دیرینہ مسئلے کو ہمیشہ کے لیے حل کر دیں۔ اس کے علاوہ اسرائیل سے اپنی گہری وابستگی کا ذکر کرتے ہوئے ڈونلڈ ٹرمپ نے مسکرا کر دعویٰ کیا کہ وہ اگر اسرائیل جائیں تو وہاں کے وزیراعظم بھی بن سکتے ہیں کیونکہ وہ وہاں 99 فیصد مقبولیت رکھتے ہیں۔ اپنی صدارتی کارکردگی کو شاندار قرار دیتے ہوئے انہوں نے امید ظاہر کی کہ ان کی صدارت کے اگلے دو سال بھی اتنے ہی اچھے اور کامیاب گزریں گے۔