ٹرمپ نے جے ڈی وینس کو بظاہر خارجہ پالیسی معاملات سے ہٹا دیا، داخلی امور پر توجہ دینے کی ہدایت

امریکی صدر ڈونلڈ ٹرمپ نے نائب صدر جے ڈی وینس کو مبینہ طور پر خارجہ پالیسی کے اہم معاملات سے ہٹاتے ہوئے اپنی تمام تر توجہ امریکی داخلی امور اور ڈیموکریٹس کے زیرِ انتظام شہروں میں کرپشن کی تحقیقات پر مرکوز کرنے کی ہدایت کر دی ہے۔

امریکی صدر ڈونلڈ ٹرمپ نے سوشل میڈیا پر اپنے ایک بیان میں دوٹوک الفاظ میں کہا کہ امریکا کو اب ایران کے ساتھ کسی معاہدے کی کوئی ضرورت نہیں ہے، کیونکہ واشنگٹن کے پاس ایران کے سیکڑوں ارب ڈالر کے منجمد اثاثے اور آبنائے ہرمز کا کنٹرول موجود ہے۔ اس پیش رفت کے ساتھ ہی انہوں نے نائب صدر جے ڈی وینس، جو کہ اب تک روس اور مشرقِ وسطیٰ کے امور سمیت جنگ کے خاتمے کی سفارتی کوششوں میں متحرک کردار ادا کر رہے تھے، کو ہدایت کی ہے کہ وہ اپنی توجہ ہٹا کر ملک کے اندرونی مسائل پر توجہ دیں۔

یہ احکامات معروف امریکی اخبار ’وال سٹریٹ جرنل‘ کی اس رپورٹ کے محض ایک روز بعد سامنے آئے ہیں جس میں دعویٰ کیا گیا تھا کہ جے ڈی وینس ایک سینیئر ایرانی سکیورٹی عہدیدار کے ساتھ آمنے سامنے براہِ راست امن مذاکرات کرنے پر غور کر رہے تھے۔ اس سے ایک ہفتہ قبل امریکی نائب صدر نے مڈٹرم انتخابات میں ریپبلکنز کو درپیش سیاسی شکست کی ایک اہم وجہ ایران کے ساتھ جاری جنگ کو قرار دیا تھا۔

غیر ملکی خبر رساں اداروں کے مطابق صدر ٹرمپ کے اس بیان نے ان کے مجموعی موقف میں ایک نمایاں تبدیلی کو ظاہر کیا ہے، کیونکہ حالیہ ہفتوں کے دوران وہ یہ عندیہ دے رہے تھے کہ واشنگٹن میں انتخابات کے انعقاد کے بعد تہران کسی سمجھوتے یا معاہدے کے لیے زیادہ رضامند ہو سکتا ہے۔ تاہم اب صدر ٹرمپ نے واضح کیا ہے کہ انہوں نے جے ڈی وینس سے کہا ہے کہ وہ خارجہ امور کے بجائے ایک مقامی ایجنڈے پر کام کریں، یعنی امریکا بھر میں ڈیموکریٹس کے زیرِ انتظام شہروں اور ریاستوں میں مبینہ فراڈ اور کرپشن کے خلاف تحقیقاتی مہم کی قیادت کریں۔

صدر ٹرمپ کا مؤقف ہے کہ بڑے پیمانے پر ہونے والی ان مجرمانہ سرگرمیوں کا تدارک کر کے امریکا کے قومی بجٹ کو تیزی سے متوازن کیا جا سکتا ہے۔ واضح رہے کہ جے ڈی وینس، جنہیں 2028 کے صدارتی انتخابات کے لیے ریپبلکن پارٹی کی نامزدگی کا ایک مضبوط امیدوار سمجھا جا رہا ہے، نے گزشتہ ہفتے مڈٹرم انتخابات میں پارٹی کو پہنچنے والے نقصان کے بعد خود کو اس جنگی و خارجہ محاذ سے دور کرنے کا عندیہ دیا تھا۔